MASTAA wa Manchester United watapata nafasi ya mwisho ya kuhakikisha wanamshawishi kocha Louis van Gaal ili kupata namba kwenye kikosi cha msimu ujao wakati itakapopigwa mechi ya wenyewe kwa wenyewe uwanjani Old Trafford.

Man United imekamilisha ziara yake ya Marekani ambapo mchezo wake wa mwisho wa kirafiki dhidi ya Paris St Germain jana Alhamisi asubuhi ulimalizika kwa kichapo cha mabao 2-0 na sasa timu hiyo itarudi Manchester kusubiri Ligi Kuu ianze.

Awali, Van Gaal alikuwa amefuta mechi za kirafiki ndani ya Old Trafford, lakini sasa ameibuka na staili mpya ya kukigawa kikosi chake katika vikosi viwili ambavyo vitacheza mechi na hapo atachagua timu moja itakayomenyana na Tottenham Hotspur kwenye Ligi Kuu England Agosti 8.

Kocha huyo atatumia mechi hiyo kupata wakali wa kuanza katika mechi hiyo ya kwanza ya Ligi Kuu na naamini itampa muda mzuri kutokana na ushindani wa namba uliopo kwa sasa. Van Gaal hataki kurudia ya msimu uliopita ambapo alivuna pointi 13 tu katika mechi 10 za mwanzo.

Vikosi hivyo, kikosi cha kwanza kitakuwa na mastaa De Gea; Darmian, Jones, Blind, Shaw; Schneiderlin, Carrick; Mata, Depay, Young na Rooney na kikosi cha pili kitaundwa na Romero; Smalling, Blackett, McNair, Rojo; Schweinsteiger, Fellaini; Valencia, Herrera, Januzaj na Wilson.